تجربتي السيئة مع جوميا Jumia

Abdelrahman Emad

09-08-2020 - 01:14 pm

طلبت من Jumia منتج سعره 1700 جنية يوم 5/3 , دفعت سعر المنتج بالفيزا و اتسحب من الرصيد عادى
* ميعاد التوصيل المفروض يوم 9/3 جالى ميل اليوم دا ان الاوردر اتكنسل من غير ما يقولوا اى اسباب
* دخلت على الموقع اشوف المنتج مش متوفر ولا ايه المشكلة الاقيهم زودوا سعره و بقى ب2000 جنية و انت اخبط راسك فى اقرب حيطة او اطلبه تانى بالسعر الجديد و الفلوس اللى اتسحبت استنى عليها اسبوعين بقى معاهم تكون عملتلهم فوايد فى البنك
* هى دى حالة فردية ولا دا الطبيعيى كدا و مبقاش فيه حقوق للمستهلكين فى مصر من الجشع و السرقة و البلطجة و قلة الادب دى ؟؟
* تعديل : كلمت خدمة العملاء و طلبت منه يوصلنى بحد مسؤل قالى دا غير متاح و قفل فى وشى السكة, انا اول مرة فى حياتى اشوف كول سنتر بيقفل السكة فى وش العملاء

التعليقات (60)

Amir Ahmed

09-08-2020 - 02:15 pm

ياباشا الدفع عند الاستلام ده احسن حاجه ليه تدفع فيزا

Abdelrahman Emad

09-08-2020 - 03:18 pm

الطبيعى ان دى المفروض وسيلة دفع اسهل و انا حقى ان المنتج يوصلى بالسعر المعروض فى الميعاد المتحدد

Amir Ahmed

09-08-2020 - 04:23 pm

Abdelrahman Emad
الدفع عند الاستلام عشان لو المنتج فيه حاجه مش سليمه زي ما طلبتها ترفض تستلمه وده للي الشركه ماشيه بيه ، انما يتعمل ليك refund بالمبلغ من حساب التاجر ليك ده وجع دماغ وهتستني كتير عشان كده افضل ليك ونتا بتستلم تتأكد من المنتج وبعدين تدفع