اسعار افضل فنادق سيوة

النهارده هنتكلم عن الاقامه في سيوه🌴🌴

الاسعار اللي هكتبها للفرد في الغرفه الدابل و كمان بتتغير من موسم للتاني
بس دي اسعار تقريبيه لاغلب الوقت

الاوتيلات اللي برشحها في منها عن تجربه شخصيه و عملت اقامه فيها بالفعل و
في منها لا بس شوفتها و عارفه اماكنهم و الريڤيوهات عنهم❤️❤️❤️

✅ فندق زهره المدينه. ( تجربه شخصيه)
ده اوتيل بسيط مش هتحس بالديزاين السيوي هو للاقامه العاديه جدا و بيبقي في
حدود 150 للفرد في الغرفه الدابل بدون فطار من مميزات الاوتيل انه رخيص و
انه قريب من السوق و نضيف

✅فندق كيلاني. ( بدون تجربه شخصيه)
250 بدون فطار نفس فكره زهره المدينه هو للاقامه بس مفيش ديزاين سيوي و من
مميزاته انه في السوق و سعره رخيص

✅فندق واحه سيوه. ( اقامه شخصيه)
ده تبع القوات المسلحه نضيف و الديزاين بتاعه لطيف بس المعامله في الاوتيل
ميري شويه 😄😄
في العموم اوتيل كويس بيبقي في حدود 350 بالفطار في الغرفه الدابل و من
انضف الاوتيلات في سيوه
و كمان الغرف كانت واسعه و دي حاجه عجبتني
و ميه الحنافيه عذبه يعني متحليه لان معظم اوتيلات سيوه مفيهومش ميه متحليه
بعيد شويه عن السوق بحوالي 10 دقايق مشي

✅دريم لودچ. (اقامه شخصيه)
بينه و بين السوق 10 دقايق مشي
الديزاين بتاعه سيوي جداا و جواه كهف ملح صغير و حمام سباحه و يعتبر من
اشهر اوتيلات سيوه
الاستاف لطيف و كلهم سيويين نضيف بس ممكن تلمح نملتين كده
325 للفرد في الغرفه الدابل بالفطار
و الاقامه هناك هتتبسط بيها و مختلفه

✅سيوه بارادايس. (بدون اقامه شخصيه)
ده قريب جدا من السوق واخد الطابع السيوي زي دريم لودچ و فيه حمام سباحه بس
الغرف الديزاين بتاعها قديم شويه و من اشهر اوتيلات سيوه و نضيف في العموم
350 للفرد في الغرفه الدابل بالفطار

✅كامب مراسينا. (اقامه شخصيه)
بجد ده من اجمل الكامبات في سيوه موقعه علي جزيره فطناس شكله مختلف و جديد
و ناس كتير بتروح مخصوص تتصور عنده الاكواخ نضيفه و مريحه نفسيا.
ده للناس اللي بتدور علي الاقامه البسيطه و الفصلان
ممكن من العيوب البسيطه اوي ان ساعه الغروب بيبقي فيه ناموس و بيختفي بعد
الغروب بسبب البحيره
ممكن كمان انه بعيد شويه عن السوق بس في رأيي انه من اجمل الكامبات هناك
في حدود 400 للفرد بالفطار في الكوخ الدابل

✅كامب علي خالد. ( اقامه شخصيه)
من اكتر الحاجات اللي بتميز الكامب ده هي الاجواء الليليه و عين الميه
السخنه اللي بتنزلها في عز البرد 😍😍
الغرف نضيفه و الاقامه لطيفه و الاستاف مرحبين بالناس من عيوبه انه بعيد عن
السوق بس فصلان خالص و دماغ رايقه
350 للفرد في الغرفه الدابل بالفطار

👈👈الاوتيلات في سيوه بسيطه و بتعتمد علي الطابع السيوي و الطبيعي عشان
تفرق بين الاوتيل الكويس و الوحش هو الرش للغرف و عدم وجود ناموس او دبان
او نمل في الغرف
و الصراحه الطبيعي في سيوه ان الجو العام فيه ناموس
الغرف ممكن تبقي بسيطه بس نضيفه و دي اهم حاجه.

اتمني اكون فيدتكم و بكرا هنزل الرحلات و الاكتيڤيتيز اللي تتعمل هناك
تابعوني و شير كتير للبوست 😄😄