"ريبوتا Reboota" منصة تواصل اجتماعي تم تطويرها باياد عربية، تهدف إلى اثراء المحتوى العربي و انشاء مجموعات من الاهتمامات المشتركة بين مجموعة كبيرة من المستخدمين بغرض تبادل المعلومات و الخبرات و التجارب.
كل المجموعات يتم إداراتها آلياً وفق خوازرميات يتم تطويرها تسمح بالتدفق المحايد للمعلومات، ندعوك لدعم ريبوتا من خلال نسخ رابط المجموعة المهتم بها ونشرها مع الاصدقاء و المهتمين للمساهمة في تطوير وانتشار المنصة...
Rana Magdy
01-05-2021 - 06:37 am
حد ليه تجربة مع العربيات الخليجي يفيدني من فضلكم
محتاجة عربية و فيه تاجر عربيات خليجي عنده حاجات كويسة و اسعارها حلوة بس كلهم في جدة و بينزلو يترخصو في مصر
حد جرب الموضوع دا و طلع كويس و مفيهوش مشاكل
فيدوني ضروري بالله عليكم عشان دي تحويشة العمر


التعليقات (21)
Amr Abdelmagid
Amr Abdelmagid
هقول لحضرتك. عشان تنزل بدون تعب وتدخل من الجمارك لازم تتأكدي انك مالك اول. اول تكوني منسقه مع حد من التخليص الجمركي عشان يظبط ورقها من قبل م تيجي

Islam ELmwafy
Islam ELmwafy
Amr Abdelmagid
ممكن تنزل مش مالك اول بس بيبقي ضاربلها ورق

Islam ELmwafy
Islam ELmwafy
Amr Abdelmagid
واصلا العربيه تمنها مع جماركها بيساوي تمن اللي فمصر... ولو تمنهم متساوي يبقي من مصر احسن لات العربيه فالخليج لما يعدي عليها سنتين بالكتير بتبقي اتهلكت... وبتعد كيلوات كتير

Amr Abdelmagid
Amr Abdelmagid
Islam ELmwafy
ايوه يا باشا. انا منزل عربيتي وضارب لها ورق. عشان كده قلتلها تنسق مع مخلص جمركي ف السويس قبل م تجيبها. هم عارفين السكه كويس.

Amr Abdelmagid
Amr Abdelmagid
والتعليق التاني ذكرت فيه انها نفس السعر وتزيد عن مصر مع فرق ال quality للخليجي

Rana Magdy
Rana Magdy
Amr Abdelmagid
العربيات كلها مستعملة بس المفروض استعمال كويس و هوا اللي بيخلص موضوع الجمارك و الرخص قالي ممكن ارخصها انا او هوا

Amr Abdelmagid
Amr Abdelmagid
Rana Magdy
الترخيص انتي تخلصيه مفيش فيه مشكله. المهم الجمرك. بس نصيحه اتأكد كويس منه لان السعوديين بيهلكوا العربيات ومش بيرحموها

Islam ELmwafy
Islam ELmwafy
Ihab Malak Saad
?

Mahmoud Badawy
Mahmoud Badawy
لو بتتكلمي على العربيات الخليجي في المجمل الزيرو من معرض محترم فطبعا تقفيل العربيات الخليجي أحسن من هنا بكتيييير ... لكن لو مستعمله لازم يكون معاكي حد أمين يفهم في العربيات كويس لأن الخلايجه معظمهم بيهلكوا العربيات بمعنى الكلمه قبل م يغيروا ... ويفضل يكون معاكي محامي أمين للتأكد من صحة الأوراق منعا لتعرضك للنصب ويبقى يتأكد لما تيجي بيها مصر جماركها وترخيصها هيبقى عامل كام عشان متلقيش نفسك مديونه أو العربيه محجوز عليها ... وربنا يقدم لك الطيب

Amr Abdelmagid
Amr Abdelmagid
بجانب لازم تعرفي الموديل كويس وبلد المنشأ عشان تعرفي الجمرك كم. عشان ممكن تلاقي ف الاخر السعر مش زي اللي ف دماغك وتساوي نفس السعر ف مصر أو تزيد. مع فرق ال quality طبعا للخليجي

Amr Abdelmagid
Amr Abdelmagid
هو لو حضرتك مش ف السعوديه ومش مقيمه فيها يبقى اللي هيحصل انه هينزل العربيه ب اسمه الأول ويخلصها جمرك وترخيص وبعد كده ينقلها ليكي بيع وشراء.

Nabil Dowidar
Nabil Dowidar
رجاء انسي اللفة الطويلة دي لأن كلها نصابين وحرامية خلي حد فاهم من أهلك يشتري لكي سيارة من نفس مدينتك وانسي كل كمية المشاكل اللي انتي بتحري وراها سوق مدينة نصر وحد من أهلك ولا تبحثي عن المشاكل

Rabab Ahmed Zeitouny
Rabab Ahmed Zeitouny
بلااااااش افتكري اني قلتلك بلاااااااش

Kareem Elaryan
Kareem Elaryan
نصيحتى ليكى بلاش بلاش بلاش لا يغرك سعرها

Rana Magdy
Rana Magdy
Kareem Elaryan
ليه بلاش من فضلك

Kareem Elaryan
Kareem Elaryan
Rana Magdy
حضرتك افضلك تشترى عربية زيرو من مصر افضل من عربية استعمال خليجى متعرفيش فيها اية ولا كان بيتعمل بيها اية فى الخليج . السيارة الخليجى اللى هتشتريها ممكن يكون متفحط بيها ومدعوكة ومتظبطة وملعوب فى عداد الكيلو متر وانتى تلبسيها عادى جدا واتخن ميكانيكى عندك مش هيعرف وتانى حاجة ملهاش عندك صيانة مجانية فى التوكيل بالتالى لو حصل فيها حاجة هتدفعى من حسابك . لكن مهما كان لو اشتريتى زيرو من مصر عندك ضمان وصيانة دورية فى التوكيل لمدة معينة . بالتالى نصيحتى ليكى اشترى نفسك وراحة بالك فرق كبير اوى لما تشترى سيارة انتى اول مستخدم تحت رجلك ولما نشترى سيارة مش عارفة تاريخها مع المستخدم اللى قبلك اية . دى نصيحتى ليكى وقد أكون على خطاء. ملحوظة انتى بنت اكيد محتاجة راحة البال مش كل شوية خازوق يظهر فى العربية وتبهدلك . اسالى كويس مهما كان شكل العربية حلو وسعرها مغرى لو كان فية خير ما كان رماة الطير . اخيرا القرار قرارك . مش بحبطك والله بس انا عايش فى الخليج وعارف اللى بيحصل ومفيش فرق كبير غير فى جودة التكييف فقط السيارات الخليجى تكييفها اقوى هى مصممة لجو الخليج


رأيكم في سماعات JBL BOOMBOX 2
رأيكم افضل نوع شبابيك pvc