Ahmed Abdullah
21-03-2022 - 12:16 am

امبارح حضرتك مؤتمر شركة unicity فيتامينات امريكية في مصر .
لم اسمع عنها من قبل .. طلب الحضور تم من قبل بنت اعرفها معرفة شخصية قالت
انا بثق في حكمك وعايزة اعرف الموضوع ده كويس ولا لا .. كنت رافض في الاول
وقولت لها بلاش لانها قالت انهم بيعتمدوا على التسويق الشبكي وباعولها
الوهم كده فرفضت الموضوع من الاول وبعدين اصرت احضر معاها علشان احكم من
خلال كلامهم .. المهم حضرت معظم الحضور بنات وستات والرجالة الي جاي زي
حالاتي كده عن طريق بنت او ست .. المحاضر والمبيعات والتسويق او المسئول
العربي عن الشركة الام شباب من الاردن اسمهم مالك شهوان و عباده جبريل .. الشاب تاخر نص ساعه عن المؤتمر
قالوا نقوم نصلي منغير ما يوضحوا ان المحاضر متاخر اصلاً .. وبعدين اقعد الاقي مجموعة من الفيتامينات و تركيبات ادوية وقهوة المهم يعني
حاجة كده زي بتاعت الاعشاب ..

قولت للبنت ان دول ناس دارسين نصب باحتراف وبتلعب على حاجات مقنعه بالنسبة للفئة الي بيستهدفوها زيك وغيرك.. ده غير ان المنتجات دي فيتامينات موجودة في افضل الشركات بتكلفة اقل من 1% من الشركة دي..

الطريف اني قمت روحت بيتي وسبت البنت تكمل اكتشف ان البنت اشترت قهوة ماتشا و فيتامينات ب ١٤ الف جنية صدق او لا تصدق .. باعوا لها الوهم وانها هتشتغل معاهم وتحقق ارباح خيالية ...

وهي البنت نفسها لحد اللحظه متخيله ان مفيش نصب ومفيش حد ضحك عليها وفعلا
انا حصلي ايرور في تركيبة عقلي المتواضعه لاني شوفت بنات كتيرة ومعظمهم
متحمسين وكان رحلة مش مهم تدفع ٢٠ الف وتورط صحباتها واهلها في حاجات هوا
لكن انا باصه على رحلة المالديف ..

رأيكم انتوا ايه في الشركة دي يونيسيتي مصر


تريند

التعليقات (48)

Hopa Mahdi
Hopa Mahdi
21-03-2022 - 01:17 am

ويرجعو يعيطو لما يضحك عليهم.. والموضوع بيبقى واضح زى الشمس... زى لسه فى
ناس بتعدى على البيوت وتقول على مسابقه من شركه اريال ولسه الناس بتدفعلهم
وينزلو بوستات ويعيطو ... ليه مافيش وعى.. ولا توعية
Fatima Taher
Fatima Taher
21-03-2022 - 02:20 am

سبحان الله اتعرض عليا الموضوع دة ولا دخلو دماغى. بربع جنيه
Sara El Hadidi
Sara El Hadidi
21-03-2022 - 03:25 am

دول بياخدوا كورسات ف النصب ع الناس
Emad Saleh
Emad Saleh
21-03-2022 - 04:32 am

الناس مش عبيطة بس طماعة
الكل بقا فاهم فكرة التسويق الشبكي بس املهم انهم يلحقوا حته في راس الهرم
مش في ديله علشان يقلبوا شوية طمعانين زيهم في شوية فلوس ويخلعوا
Nora Saad
Nora Saad
21-03-2022 - 05:41 am

الطماع فريسة سهلة للنصاب
محمد عادل
محمد عادل
21-03-2022 - 06:52 am

الناس مبقاش عندها تفكير ب ٥ جنيه
Âhmd ÂL-Kêshky
Âhmd ÂL-Kêshky
21-03-2022 - 08:05 am

انا اعرف واحد اتنصب عليه من شركة زى دى مش فاكر اسمها اية بتاعه أدوية
برده المهم اتنصب عليه فى تلاته مليون جنية .. وده فرد واحد بس .. اقسملك
بالله هذا ما حصل .. مع العلم كلنا قلناله ان ده نصب ومع ذلك استمر واتنصب
عليه .. فعلا طول ما المغفل موجود النصاب بخير
Hany Abdallah
Hany Abdallah
21-03-2022 - 09:20 am


Âhmd ÂL-Kêshky

وعمل ايه لما عرف انه نصب؟
Âhmd ÂL-Kêshky
Âhmd ÂL-Kêshky
21-03-2022 - 10:37 am


Hany Abdallah


الناس اختفت ومعرفش يوصل لحد .. كل سنة وانت طيب
Mostafa El Henawy
Mostafa El Henawy
21-03-2022 - 11:56 am

شوف ياستاذ خدها قاعدة ذهبية .اى نصاب امامه ١٠٠ طماع ..ولولا وجود
الطماعين لما وجد النصابين من الاساس .
Kareem Mohamed
Kareem Mohamed
21-03-2022 - 01:17 pm

شركة جينيس؟
Mohamed Elhelbawy
Mohamed Elhelbawy
21-03-2022 - 02:40 pm


Kareem Mohamed

تعرف عنها ايه الشركة دى لو سمحت ؟؟
Ola Salah Eldin
Ola Salah Eldin
21-03-2022 - 04:05 pm


Mohamed Elhelbawy


تسويق شبكي
وهم واستهبال عمري ما ارتحت لهم
Mohamed Elhelbawy
Mohamed Elhelbawy
21-03-2022 - 05:32 pm


Ola Salah Eldin

نصاببن برضه يعنى ؟؟
Ola Salah Eldin
Ola Salah Eldin
21-03-2022 - 07:01 pm


Mohamed Elhelbawy


يا فندم دول بيشترطوا إننا نشتري منتجات لما يعادل 6000 ج مصري ع الأقل
عشان ناخد الكود ونبدأ نبيع
بنت منهم قالت لى هسلفك واشتغلي
طبعا رفضت وقلت ده تهريج
نظام تسويق شبكى ويطمعوا اللى قدامهم
تحس انك داخل فخ
Kareem Mohamed
Kareem Mohamed
21-03-2022 - 08:32 pm


Mohamed Elhelbawy

هي مش تسويق شبكي بالمعني الحرفي بس هي بتخليك تسوق لمنتجات انا شايف ان
سعرها مبالغ فيه ده غير ان مكسبك في زيادة اشتراك الناس مش من بيع المنتجات
Randa Hussin
Randa Hussin
21-03-2022 - 10:05 pm

الحمد لله ان حضرتك قلت التفاصيل..
انا وصيتك تقولى..
انا صاحبه المطعم اللى اتغديت فيه😁
Sherin Moghazy
Sherin Moghazy
21-03-2022 - 11:40 pm

دا اسمه طمع و هو الي بيجمل اي شيء في سبيل الهدف المنشود 🤷
Eslam Abduo
Eslam Abduo
22-03-2022 - 01:17 am

البزنس بشكل عام بيحتاج جراءهـ ، لكن في فرق كبير بين الجراءهـ والحماقه ،
والفرق الكبير مابينهم بيبدأ يتقلص لما يحضر الطمع ، وكل مازاد الطمع زادت
الحماقه واختلط على صاحبها الفرق بينهم ، ودي النقطه اللي بتلعب عليها
شركات الأوهام والتايم شير وانزل البلد يامحمد ابوك لقى بلاص جبنه قديمه
وأغلب شغل النصب القديم والجديد ، والعجيب إن كل فخ من دول بيكون ليه فريسه .
هبة محمد
هبة محمد
22-03-2022 - 02:56 am


Eslam Abduo

الله ينور
Mohamed M Naguib
Mohamed M Naguib
22-03-2022 - 04:37 am

التسويق الشبكى عباره عن واحد لبس نصبايه فبيجيب واحد يعرفه يلبسه النصبايه
عشان يعرف ياخد فلوسه.وطبعا عشان مايبقاش عليهم مساىلة قانونيه بيجيبوا اى
منتج كأنهم بيبيعوه مقابل الفلوس اللى بياخدوها كستارة عن نوعية شغلهم فى
التسويق الشبكى.الخلاصه وهمx نصب
Dina Ayman
Dina Ayman
22-03-2022 - 06:20 am

هو نوع من التسويق متعارف علبه قي أمريكا اسمه LCL
بس مش في مصر معروف يعني مش نصب بس حسب ثقافتهم دة منتشر هناك
Sarah Elaraby
Sarah Elaraby
22-03-2022 - 08:05 am

اسمه في امريكا mlm
Multilevel marketing
لكنه في الحقيقة pyramid scheme
و اكبر نصب و الناس اللي بيستهدفوكم هناك ستات بيوت
و بيتداينوا و بيتخرب بيتهم.
ده مش بس نصب ده نظام افتراسي بيلعب علي احلام الناس و عجزهم
السيد شلبي
السيد شلبي
22-03-2022 - 09:52 am

المغفلين الذين لا يحميهم القانون 20% من أي مجتمع شريحة تقع بين المرضي
العقليين لأسباب عضويه و متوسطي الذكاء
إيمي محمد
إيمي محمد
22-03-2022 - 11:41 am

حوار قدييييييييم جدا ولسة شغال ازاي الله اعلم 🤔
Mazen Salah
Mazen Salah
22-03-2022 - 01:32 pm

النصاب دايما بيدور ع الطماع
Ahmed Abdullah
Ahmed Abdullah
22-03-2022 - 03:25 pm

كمان الشركة اصلا مطلعتش امريكية 😭
Mostafa El Nawam
Mostafa El Nawam
22-03-2022 - 05:20 pm

دي قهوة تمنها ١٤ الف جنية
الشيماء محمد فؤاد
الشيماء محمد فؤاد
22-03-2022 - 07:17 pm

معلش واحدة معاها 14 الف و هي نازلة من بيتها عادي
بتدور علي شغل لية 😄
Ahmed Abdullah
Ahmed Abdullah
22-03-2022 - 09:16 pm


الشيماء محمد فؤاد

اشترت الحاجات على دفعات علشان تاخد هوا في الاخر ... دي الفكرة بيع الوهم
Rony Abdurrahman
Rony Abdurrahman
23-03-2022 - 01:20 am

بالمناسبه دكتور الكركمين مش نصاب وعالج حالات كتير اعرفها فا دا اول حاجه
تبين ان حكمك سطحي وغلط لكن ان واخده تدفع 14 الف فقعوه. وحاجات كدا فلو
اتنصب عليهت مش هيفرق معاها بقي
Ahmed Abdullah
Ahmed Abdullah
23-03-2022 - 03:25 am


Rony Abdurrahman

انا حقيقي معرفش حاجة عن موضوع الكركمين غير ان صاحبه اتحبس وده وضحته ..
ثانيا انا فقط بقول زي ما في مراجعه على نشاط الافراد لازم الدولة تشوف
الشركات دي وكمان طلعت شركة وهميه يعني وبتعتمد على التسويق الشبكي .. انا
البنت دي عارفها كويس اي حد يضحك عليها ودي مش اول مرة ..
Rony Abdurrahman
Rony Abdurrahman
23-03-2022 - 05:32 am


Mostafa El Nawam
طب
حاول تنصحها وتكلمها تاني مدام هي غلبانه كدا
Mohamed Gaber
Mohamed Gaber
23-03-2022 - 07:41 am


Rony Abdurrahman


كلامك مش دليل علمى ده اول حاجة
لو بتعرفى تبصى ع ابحاث
ابو النصب بيستشهد بدراسات ع خلايا امعاء خنزير و محاكاه ع الكمبيوتر و فيران
Mohamed Gaber
Mohamed Gaber
23-03-2022 - 09:52 am

لو عاوزة كلام علمى يعنى
برشامة الوهم مفهاش مادة فعاله فاعليهاةفى تسكين الصداع ٢٢%
يعنى لو اديتها ل 1000 شخص
فى 220 واحد هيتحسنوا
مع انها وهم
فبلاش كلام و تجارب اشخاص لان ملهاش لازمة فى العلم
Tarek Hamed
Tarek Hamed
23-03-2022 - 12:05 pm

يعنى إيه طول مافيه طماع فالنصاب بخير
لا طبعا ماكلنا طماعين وعايزين نكسب ولا احنا زهاد يعنى،
هى اسمها طول ما الاهبل موجود فالنصاب بخير،
دة هبل
منا كنت مراهق وحضرت المحاضرات دى وشركة شنيل فاكرينها
ولا دخل دماغى بربع جنيه كلامهم؟
بيبقى واضح قوى معرفش الناس اللى بتصدق دى ايه
Mohammed Saleh
Mohammed Saleh
23-03-2022 - 02:20 pm

هما بيلعبوا على نقطة الطمع وان الناس عايزة تكسب بسرعة ويحسسهم ان الموضوع
سهل وانها لو باعت لخمسة من قرايبها مش عارف تكسب كام وللاسف احنا بقينا
عايشين بالسحت والفهلوة
Eslam Ebied
Eslam Ebied
23-03-2022 - 04:37 pm

هي مكانتش عايزة حكمك ولا حاجة،
هي كانت بتتلكك عشان تخليك تحضر علي امل ان المتحدث يقنعك
Hesham Adam
Hesham Adam
23-03-2022 - 09:17 pm

التسويق الهرمي ومسماة الحديث التسويق الشبكي والاتنبن واحد مجرم في أغلب
اقتصاديات العالم
بيضحكوا على الناس وياخدو فلوسهم
تخيل انك تقنع واحد مفلس مش لاقي شغل انه يدفع آلاف الجنيهات على أمل انه
يبيع لغيره ويكسب
واللي بيلبس معاهم وميلقيش حل يقولولَو روح بيع لعيلتك وقرايبك فبدل ما يلبس
لوحده ياخد عيلته كلها معاه...
طمعا في أنه يكسب ويجيب المرسيدس c زي الكوتش .... او بورش كايين
وأغلب اللي بيتخدع منهم بنات وشباب في أول العمر
والسيدات الفاضلات المسؤلين عن أسرهم بيستغلو عدم خبرتهم
الأغرب ان ملهمش دايما مقر ولا عنوان
وتلاقي مقراتهم كلها كافيهات
الأغرب بقا لما تدور وراهم هتلاقيه هم هم الناس اللي كانت واخده أحكام في
قضايا شبكات هرمبه سابقه بس الجديد بقو بيعتمدو َ على ناس من الاردن ولبنان
حاليا
Rehame El Henawy
Rehame El Henawy
23-03-2022 - 11:40 pm

المشكلة الأكبر انها اشترت منتجات متعلقة بالصحة!! يعنى معلش منين جتلها
الجرأة تجرب فى نفسها أو فى أى حد حاجة مجهولة الهوية تبلعها و تدخل
جسمها؟؟!! ايه عرفها تأثيرها هيكون ايه؟! مش كل فيتامين أو مكمل بيصلح لكل
الناس!
ده أحيانا العلاج اللى كاتبه طبيب مختص ممكن يئذى لو لخبطت فى الجرعة أو
حتى الدكتور نفسه اختلط عليه التشخيص! يجى حد مالوش فيها يدينى حبوب و
مساحيق و سفوف و انا ابلعها عادى كدة؟؟!!! حتى الفيتامينات المتعارف عليها
دوليا و المصرح ببيعها on shelf مش بتبلبع كدة عميانى! لما بنروح الصيدلية
فى قسم استشارات و الصيادلة بيقولوا ايه ينفع يتاخد مع بعض و ايه لأ و
بيشرحوا الجرعات و المحاذير و ما إلى ذلك... الكلام ده بقى موجود فى
الصيدليات فى مصر كمان من كذا سنة خصوصاً الكبيرة اللى بتوفر المنتجات دى.
اكسب فيها ثواب و نبهها ان لو حد اتأذى صحيا بسبب المنتجات دى هتشيل ذنبه
غير انها هتتبهدل فى النص، فى داهية ال ١٤ الف لو مش هتعرف ترجع اللى خدته
اللى حصل حصل لكن بلاش اللعب فى الصحة
Hesham Adam
Hesham Adam
24-03-2022 - 02:05 am


Rehame El Henawy

طمع المكسب الخرافي هو السبب
كلهم داخلين يشترو علشان بيبيعو لغيرهم بس لما بيتزنقو بيقولو لا احنا
شاريين لأنها منتجات كويسه هتفيدنا وده احد الردود اللي بيعلموهلهم
Mohamed Mansour
Mohamed Mansour
24-03-2022 - 04:32 am


Rehame El Henawy

كلمه مصرح من وزاره الصحه 😂
Noha Hadad
Noha Hadad
24-03-2022 - 07:01 am

للاسف في عز الازمات الاقتصاديه الناس عندها استعداد تغامر علي امل المكسب
السريع وبيفوقوا علي خسارة .... متغيرات السوق والتضخم خانقه كتير
وبيحاولوا يلاقوا مخرج فتيجي الشركات النصابه دي تصطاد في المايه العكرة
Ahmed Fared
Ahmed Fared
24-03-2022 - 09:32 am

رزق الهبل علي المجانين ! المشكلة انها حاجات ممكن تدمر الصحة وتسبب كثير
من الامراض
Mohamed Gaber
Mohamed Gaber
24-03-2022 - 12:05 pm

شكرا يا مصطفى على البوست
ربنا يجعله فى ميزان حسناتك
Mona Abdelrahman
Mona Abdelrahman
24-03-2022 - 02:40 pm

بؤس شديد
Maio Gad
Maio Gad
24-03-2022 - 05:17 pm

من حيل التسويق ..هي عمليات شرائيه من بعض الحضور ( عمليات وهميه لناس اصلا
تبع فريق التسويق في شركه لكن متخفيين بين الحضور ) لتحميس باقي الافراد
للشراء وغالبا تكون بمبالغ ..علشان الباقي يحسو ان الشراء هو القرار الصحيح
وكل الناس بتشتري ويلا نشتري معاهم بقه اكيد ليهم رؤية.!( نظرية اتباع القطيع)
Hanan Samieh
Hanan Samieh
25-03-2022 - 01:20 am

هو لسه فى ناس بتصدق وهم التسويق الشبكي
|