ايهما افضل للطفل مدرسة لغات ام كورسات تنمية مهارات لغة و كمبيوتر

المهم بالنسبة لي ال community

كنت بفكر كده زمان و لما شوفت اللي حواليا لقيت ان الطفل مبيلحقش يخلص اللي
بياخده في المدرسة اصلا عشان ياخد كورس

هي الفكره ان اللغات هتسهل عليه في الكورسات فهيبقي اسهل

السؤال هنا.. المدرسة العربي بتدي advanced English و لغة كمان كويسين ولا
سلق بيض؟ من رأيي اللغات بيبقى فيه ضغط جامد ودروس وهم في حين ان فالاخر
مثلا هيطلع مش محتاج من المواد دي الا اتنين تلاته عشان الكلية.. والكورسات
هتبقى حاجه خفيفه كده فالصيف فهيذاكروا عشان مهمة مش عشان مجبرين..
انا كنت في مدرسة خاصة فيها عربي ولغات بردو وكنت فالقسم العربي وبناخد
مناهج لغة اضافية.. وانا في ثانوي كنت بذاكر جرامر بالتحديد كتير جدا
ومهتمة باللغة ولما دخلت الكلية كمان.. ودلوقت انا certified advanced
English speaker.. بس لو هنيجي نتكلم مثلا ع مصطلحات حاجه ملهاش علاقة
بشغلي او دراستي زي ال chemistry هتلاقي ابيض.. معرفش الا فالحاجات اللي
بستخدمها او مكونات ادوية بتاعتي وهكذا.. فهو الاستخدام اللي بيحكم واي
حاجه تانية بتبقى إلى مزبلة التاريخ...
الفكرة بقى هو لو اتضغط دروس والقصص دي هيحتاج ايه فالاخر؟ وهل الحاجه دي
تستحق الضغط ده؟ اجابة السؤال ده كفاية لأخذ القرار..

Esraa Abdelmaksoud

خالص انتي فاهمه غلط عشان كنتي مدارس عربي . الاطفال في مدارس لللغات
بيتعلموا كله انجليش من كى جي زيهم زي ما انتي اتعلمتي العربي فعامل اللغه
مش بيأثر على صعوبه الدراسه لانها بالنسبه له زي العربي بالنسبه ليكي و لو
خد دروس بيبقى عشان ماده صعبه و رخمه زي التاريخ مثلا او الجغرافيا

مدرسة لغات افضل طبعا ولو الطفل نفسة شاطر مش هيحتاج للكورسات ولو حتى
احتجها هيستفيد منها احسن واسرع من غيره فى مدرسة عربى

حتى لو مدرسة لغات لابد من كورسات تنمية مهارات
الافضل مدرسة عربى وكورسات

طالما الفرق فالفلوس مبلغ قليل فالاحسن تخليه لغات هو أكيد حضرتك هتحس أن
المذاكرة صعبة بس الولد نفسه مع الوقت بيتعود و بيلاقي الموضوع سهل عادي
كأنه بيذاكر بالعربي و من وجهه نظري أنا أن ممكن جدا لما يكبر يحتاج ياخد
كورسات برضوا معتقدتش ان مكان واحد هيعلم كل حاجة بس درجة الصعوبة و الفهم
بتختلف خد أراء و صلي صلاة أستخارة وإن شاء الله توصل لقرار مناسب

لو فى امكانية للغات انقله لغات افضل طبعا ومش هتحتاج ساعتها لكورسات لانه
كده كده هيتعلم اللغة ف المدرسة.
وفى وظايف بيبقى الاساس خريج مدارس اللغات لانه مهما اخد كورسات مش هيبقى
زى اللى بيتعلم من صغره يوميا ف المدرسة وهيبقى ملم بكل المصطلحات سواء ماث
او ساينس وغيرهم لكن الكورسات هتبقى محادثات وخلاص

المدرسة لغات طبعا افضل حتى لو مستوى اللغة ضعيف بها يبقا سهل علية بعد كدا
اى كورس واكيد هيبدا من ليفل عالى مش من البداية طبعا

انا شايفه من وجهة نظرى انه المدرسه اللغات هى اللى هتأهله لمستقبل احسن
وانه لما يخلصها او حتى وهو فيها وخد كورس واحد استيعابه هيكون اسرع
والدنيا هتكون سهله عليه على عكس المدرسه العربي

ينقل لغات طبعا...الكورساتعمرها ابدا ما هتغني عن مدرسه اللغات.
انا مدرسه و عارفه بقولك ايه..

اهم حاجة كمان انك تشجع الطفل انه يسمع كرتون وفيدهات بالانجليزي من غير
ترجمة في السن الصغير ده بيلقط اللغة حلو انا ابن اخويا ماشاء الله لقط
اللغة بالطريقة دي ونطقه في الانجليزي فرق كتير

وجهة نظري أن المدرسة لوحدها ملهاش قيمة كلام بيتعبي و يترمي في ورقة
الامتحان نظام عقيم و معفن و فاشل شوف الطفل بيحب ايه و اشتغل عليه و لو مش
محدد يبقي يجرب كذا حاجة لحد ما يقرر و المهم في السن الصغير حفظ القرأن
برضو و غرس القيم و المبادئ

الكورس مش هيخلي الولد ملتزم بالمذاكرة زي المدرسة بس اهم حاجة تكون مستوي
التعليم في المدرسة كويس لان فيه مدارس لغات اي كلام لو المدرسة مستواها مش
حلو يبقي تعتمد علي الكورسات
بس الافضل مدرسة طبعا لان المدرسة الوقت فيها اطول ومواد كتير ب اللغات لكن
الكورس مجرد ساعتين علي مدار شهر او شهرين استحالة الطفل يدرس كله فيه

أنا بتكلم عن كورس مستمر سنتين او تلاته مش شهر او اتنين