انشاء حضانة اطفال

بالعكس هو مشروع مربح جدا جدا في حضانات ابتديت بي فرع و بعد فتره بقي ليهم
كذا فرع اهم حاجه عايزه مشروع يكسب و يكبر لازم إدارة ناجحه و النظافه و
الجوده والمدرسين و الاكل و الحمامات حارس الحضانه و التواصل مع الاهل كل
دا هينجح لو الادارة ناجحه ربنا يوفقك و ادرسي الموضوع و اتكلي علي الله

اي مشروع يجيبلك فلوس أن شالله لو هتعملي قراطيس لب
لازم تبقي جربتي شغل الحضانه شوفتي بتمشي ازاي
ماتستنيش فلوس من مشروع غير بعد ٦ شهور
لو معاكي راس مال يغطي ايجار و كهربا و ميه و غاز و مرتبات نانيز و مدرسين
اتوكلي علي الله

انا بنتي بتروح الحضانة من بعد ما تمت سنة يعني حوالي ٨ سنين و اخوها بعدها
بسنتين. دخلنا حوالي ٤ او ٥ حضانات. هو مشروع كويس و الناس محتاجة عشان
اغلب الأمهات بيشتغلوا.

هقولك الخلاصه.. الموضوع مربح جدا بس استخرجي الاوراق الرسميه و امشي صح و
شوفي الناس اللي هتشتغل معاكي و تدعمك لكن في مناطق محظورة و التضامن
الاجتماعي بيرفض التصاريح فيها مثلا حدايق الاهرام لا و لازم تكون دور ارضي
جيدة التهويه الشبابيك عليها سلك للنظافه و منع الحشرات و لازم حمام للبنات
و حمام للأولاد.. و في الأخر لو عملتي كل ده خديني اشتغل معاكي?

هو مشروع حلو بس محتاج متابعة جامد علشان ما يحصلش مشاكل

عشان محدش هيبقي مشروعه شغال كويس ويقولك اه انا بكسب كويس
اللي بيعلق دايما اللي بيكون مخنوق فعلا والمشروع ماحققش اللي كان متوقعة
عشان كده نصيحه صلي استخارة واتوكلي علي الله وادعي ومالكيش دعوة بتجارب حد

هو بالتأكيد مشروع مجزي جدا ماديا لكن مجهد بدنيا ونفسيا وعصبيا
فلو عندك استعداد لده يبقى توكلي على الله

بصي الي هيقلولك لا علي مشروع وهو عامله زى المتجوز وبيقول لصاحبة متتجوزش
يبقي الحل تنزلي تشتغلي في حضانة فترة افهمي الدنيا الاول وبعدين تاخدي القرار

روحي اشتغلي في حضانة شويتين عشان تعرفي مميزاتها ومشاكلها وتقرري بنفسك
هتقدري تتحملي او لأ

بيكسب جدا بس نقي مدرسين حنينين و دادات امينه و نضيفه و ربنا يرزقك ان شاءلله

متعب ومهلك جدا وربحة مش سريع محتاج صبر وحسن إدارة

لازم في الاول يكون عندك خلفيه عن شغل الحضانات
و تعرفي هتخلصي ورقك ازاي
والمكان فين
والايحار
والكهرباء
المياه
والغاز
و مرتبات المدرسين و العمال و البواب ولازم طباخه تعمل للاكل
ومدرسه رسم ومدرسه موسيقى
ومدرس العاب و مدرس تحفيظ قرآن و مدرس دين مسيحي
وهتفرشي الحضانه من اي شركه.
والألعاب وتكون جوده كويسه علشان تعمر معاكي
و تعرفي مواعيد الايفنتات
و الحفلات
و تعرفي أفضل شركات بتقدم سعر حلو في الرحلات
ولازم تعرفي الاماكن الي فيها فسح للأطفال

ولازم تعرفي انك هتصرفي كتير جدا جدا في الاول
لحد ما يجيلك اطفال
واهم حاجه الدعايه للحضانه
من فلاير
وصفحه علي الفيس
غير البوابين الي حواليكي هتديهم فلوس علشان يعملوا ليكي سمعه طيبه و
يحاولوا يجيبوا زباين وكل زبون له نسبه فيه علشان الموضوع يمشي
ده غير المسئوليه
وغير التطعيمات
ولازم يكون عندك دكتوره في العياده

ربنا يفتحلك ابواب الرزق

دراسه جدوى من a to z من شخص خبره. تعين موظفين دارسين مش اي حد يتعامل مع
أطفال الاهتمام بكل التفاصيل من نضافه ورعايه وخدمه ومتابعه لان دي أرواح
والأطفال محتاجين مجهود مضاعف ومسؤوليه كبيره فلاذم يكون عندك كل العناصر
دي وتعملي حسابك انك مش هتكسبي اول فتره. فلو خدتي سمعه كويسه المشروع
هيبقي مجدي وكويس طبعا. لكن لو مش. هتقدرى تعملي ده يبقى بلاش علشان
متدخليش في مشاكل

مرهق جداجدا

انا شغال حاليا في حضانة و الموضوع من حيث الربح بيعتمد علي عاملين العامل
الأول الموقع و المكان العامل الثاني الموظفين اللي بيتعاملوا معي الأطفال
لازم يكون محترفين في التعامل مع الأطفال لو الشرطين دول متوفرين الموضوع
هينجح و هيكون مربح
لكن فعلا دي مسئولية كبيرة جدا لأنك بتتعاملي مع اهم ثروة لأي أمة في
الدنيا فعندك مسئولية أمام ربنا سبحانه و تعالي و أمام بلدك لأنك بتشاركي
في تكوين فهم و ثقافة بعضهم و خاصة من سن ٣ سنوات ده بيكون ورقه بيضه انتي
بتشاركي في الكتابة عليها و مسئولة مسئولية تانيه امام أولياء الأمور و دي
رغم انها مش المسئولية الأهم إلا انها مسئولية بيكون عقاب الإهمال فيها دنيوي
لأن فعلا الأطفال بيصدر منها أفعال مش متوقعه و لازم يكون رد فعلنا منضبط
مش متراخي ولا عنيف رد فعل تربوي
أنا أول ما بدأت لقيت فعلا بعض الناس بتمارس عنف ضد الأطفال و بتستغل انه
طفل مش فاهم حاجه بحجة انهم بيربوا الطفل لكن في الحقيقه هو مجرد أرضاء
نفسي ليهم بسبب الإزعاج أو الفعل اللي قام بيه الطفل و ده بالنسبه للسن
الكبير اما السن الصغير فمحتاج متابعه لحظية لأنه ممكن يأذي نفسه في لحظه
عشان كده ذكرت في الأول أن من أهم عوامل النجاح العماله المحترفه
فلو في نية و هتقدري تعملي ده يبقي بالتوفيق إن شاء الله

هى مسؤليه كبيره