Basem Hassan
15-03-2018 - 10:19 pm

هل تكييف شارب الانفرتر بيوفر كهرباء فعلا


تكييف مصر

التعليقات (42)

Ossama Ghoneim
Ossama Ghoneim
27-03-2018 - 03:55 pm

أيوة ، أي تكييف بالإنفرتر (مش شارب فقط) مفروض يوفر في إستهلاك الكهرباء بنسبة ما ممكن توصل 50% وممكن تبقى 10% وممكن ما يوفرش خالص لو أسيئ إستخدامه فكرة الإنفرتر هي التحكم في سرعة دوران الكباس عند الأحمال الجزئية اللي هي أكتر من 90% من أحمال التكييف الفعلية، وبالتالي بيقل إستهلاك الكهرباء بشكل جزئي لقلة سرعة الدوران مع تحكم أفضل في درجة الحرارة داخل الغرفة، والجهاز لما يشتغل مثلا لمدة 10 ساعات على حمل 50% بيستهلك أقل من لو إشتغل 5 ساعات على حمل 100% أرجو أن الكلام يكون واضح ومفهوم للناس كلها ولو فيه أي إستفسار أنا تحت أمركم
Basem Hassan
Basem Hassan
28-03-2018 - 10:19 pm

مثلا لو التكييف ع 24 ويوفر كهرباء كويس
Ossama Ghoneim
Ossama Ghoneim
30-03-2018 - 05:31 am

بالظبط، حضرتك لما تظبط الدرجة على 24 فرص التوفير هتزيد، وغالبا توقع توفير في حدود 30% مقارنة بالأجهزة ذات كباسات السرعة الثابتة
Basem Hassan
Basem Hassan
31-03-2018 - 01:31 pm

تمام
Ossama Ghoneim
Ossama Ghoneim
01-04-2018 - 10:19 pm

لكن لو ظبطت الدرجة على 18 (مثلا، لأن بقى إجباري أن مصنعي الأجهزة ما يخلوش العميل يقدر يظبط أقل من 20 وأحيانا 21) فغالبا الجهاز الإنفرتر سيستهلك أكثر من الجهاز العادي لو هو مش
Mohamed Marmoush
Mohamed Marmoush
03-04-2018 - 07:55 am

لية في الحالة دي الجهاز الانفرتر حيستهلك أكثر ؟ المفروض إنهم يستهلكوا ذي بعض لأنهم شغالين ١٠٠%
Basem Hassan
Basem Hassan
04-04-2018 - 06:19 pm

فعلا لية اكتر
Ossama Ghoneim
Ossama Ghoneim
06-04-2018 - 05:31 am

بفرض أن الكباسين نفس القدرة ونفس التكنولوجيا، للإنفرتر كفاءة تحويل طاقة تمثل فقد Losses هنا
Ossama Ghoneim
Ossama Ghoneim
07-04-2018 - 05:31 pm

ميزة الإنفرتر في الأحمال الجزئية فقط
Ossama Ghoneim
Ossama Ghoneim
09-04-2018 - 06:19 am

طبعا هو مع الإهتمام بتوفير الطاقة فالكباسات الحديثة مع أجهزة الإنفرتر هي كباسات ذات تكنولوجيا عالية وغالبا BLDC عالية الكفاءة ، يعني لو هتقارنها على حمل 100% مع جهاز قديم أكيد هتستهلك أقل، لكني أقارنها بنفسها مرة بالإنفرتر ومرة بدونه
Baraa Fouad
Baraa Fouad
10-04-2018 - 07:55 pm

خاصية الانفرتر موفره بشكل عام انا عندي الجهازين في البيت واحد انفرتر والتاني عادي والاتنين نفس القدره، الانفرتر بيستهلك من ٥٠ ل ٦٠٪؜ من استهلاك العادي بالفعل هو موفر وفلوسه فيه، بلاش شارب هات ماركة جري، صيانتهم افضل وتكييفهم افضل، أنا حسبت الإستهلاك كويس علشان عندي عداد الكارت وحساب الإستهلاك فيه أدق بكثير للي مركز ومتابع. طبعاً متعملش التكييف على ١٨ وتستنى توفير التكييفات عندي مش بتعلى عن ٢٤ صيف أو شتاء لإني بشغله دفايا والإستهلاك على المستوى مع قفل الباب ومراعاة الأحمال والمساحات والقدرة المطلوبه، إنسى إن عندك تكييف بالنسبه للكهرباء. 4
Yasmine Zakaria
Yasmine Zakaria
12-04-2018 - 10:19 am

جري افضل حاجة بالسوق حاليا؟
Baraa Fouad
Baraa Fouad
14-04-2018 - 01:31 am

ايوه وعن تجربه
Ossama Ghoneim
Ossama Ghoneim
15-04-2018 - 05:31 pm

جري ماركة كبيرة جدا على مستوى العالم والوكيل بتاعها في مصر أحد رواد صناعة التبريد والتكييف في مصر ومن الشركات المحترمة جدا لكن شارب ممتاز، كارير رائع، LG ممتاز، ميديا ، توشيبا ، وفريش كمان وكرافت وغيرهم، أغلبهم أجهزة محترمة جدا اللي حضرتك تدوري عليه فيالجهاز هو الآتي: 1- خدمة ما بعد البيع والضمان وسرعة الإستجابة في حالة الأعطال 2- التقييم وإستهلاك الطاقة في بطاقة إستهلاك الطاقة الصادرة من هيئة المواصفات والجودة 3- السعر لأن ممكن تلاقي ماركة مغطية خدمة ما بعد البيع في منطقة ما بشكل ممتاز في حين أن لديها قصور في مكان آخر وهكذا
Baraa Fouad
Baraa Fouad
17-04-2018 - 10:19 am

كل ما سبق ينطبق على جري باقي الماركات للاسف مليانه مشاكل
Ossama Ghoneim
Ossama Ghoneim
19-04-2018 - 03:55 am

جايز، أنا مجالي التكييف والطاقة، بس بأشتغل أكثر في التكييف المركزي وشغل الأجهزة المنزلية عندي بسيط أوي فمش على دراية كافية بمن هو الأفضل في خدمة ما بعد البيع وكل هؤلاء زملاء مهنة وبعضهم أعرفهم شخصيا وهم جميعا ناس محترمون ومجتهدون
Baraa Fouad
Baraa Fouad
20-04-2018 - 10:19 pm

جري وكيله طيبه المنزلاوي كان وكيل سامسونج قبل ما سامسونج يبقى ليها وكيلها الرسمي، وهما من زمان كويسين جداً، بالنسبه للاستهلاك وبطاقة الطاقه انا عملت مقارنه قبل الشراء كل الاجهزه بطاقتهم E وجري بين B و C فالإستهلاك أفضل، + إن خدمة ما بعد البيع كويسه واخطائهم قليله لإنهم مش مستهدفين الإنتشار زي باقي الماركات وفي نهاية شهر ٩ وقفوا انتاج وبيع من المصنع لتجنب اغراق السوق زي شارب وخلافه. 3
Ossama Ghoneim
Ossama Ghoneim
22-04-2018 - 05:31 pm

أعرف آل المنزلاوي جيدا وكما قلت هم أحد رواد هذه الصناعة منذ الثمانينيات وربما أواخر السبعينيات وهم معروفون جدا في مجال التكييف المركزي، ربنا يبارك لهم ويوفقهم
Baraa Fouad
Baraa Fouad
24-04-2018 - 01:31 pm

آمين، سعدت بمعرفتك م أسامه.
Yasmine Zakaria
Yasmine Zakaria
26-04-2018 - 10:19 am

Baraa Fouad معلش لما جري وقفت انتاجها بالمصنع طيب واللي عايز يشتري بتصرف ازاي
Anis Nabih
Anis Nabih
28-04-2018 - 07:55 am

في اجهزه استهلاك الكهرباء B و C يعني زي الانفرتر وأرخص واحسن
Ossama Ghoneim
Ossama Ghoneim
02-05-2018 - 05:31 am

لا يا فندم الجهاز لو A++، وديه أعلى حاجة في كفاءة الطاقة لأجهزة التكييف، لو إشتغل بالإنفرتر هيبقى أفضل وأقل إستهلاكا للكهرباء طبعا حسب التصميم وحسب حاجات كتير لكن حتى الأجهزة اللي بالإنفرتر ليها معايير تقييم ومش كلها زي بعض عموما بطاقة كفاءة الطاقة بتجاوب على جزء كبير من السؤال لأنها بتحط القدرة القصوى وكمية الكهرباء المتوقع إستهلاكها خلال الشهر على عدد ساعات تشغيل محددة بمعايير قياسية متفق عليها في المواصفات، فتقدر تعتمد عليها في المقارنة بين الأجهزة وبالمناسبة منذ شهر 7 الماضي تم رفع معايير القبول لكافة الأجهزة ولم تعد الأجهزة ذات كفاءة الطاقة D و E مقبولة ويتم رفضها أي جهاز تم تصنيعه بعد شهر 7 الماضي يجب أن يكون C أو أعلى، ولا يزال المصنعون يوفقون أوضاعهم Anis Nabih
Anis Nabih
Anis Nabih
04-05-2018 - 05:31 am

مع احترامي لحضرتك لا يوجد اجهزه تكييف A++ وحاليا كل اجهزه شارب E والانفرتر C و اجهزه كاريير D والي انا بقوله ان هناك اجهزه في السوق استهلاك b و c من غير انفرتر ذا غير ان استمرار عمل الكباس المتواصل للجهاز الانفرتر بياثر علي العمر الافتراضي انا في السوق وعارف بقول ايه Ossama Ghoneim
Baraa Fouad
Baraa Fouad
06-05-2018 - 06:19 am

Anis Nabih الانفرتر اللي عندي A++
Anis Nabih
Anis Nabih
08-05-2018 - 07:55 am

يا باشا مكتوب عليه استهلاك كام واط ساعه
Baraa Fouad
Baraa Fouad
10-05-2018 - 10:19 am

Anis Nabih وال B و C مش أفضل من الانفرتر استهلاك الطاقه بيقاس بعدد ساعات التشغيل على قدره معينه، ال ١.٥ اللي C عندي بيستهلك ٢٢١ كيلو وات شهرياً متوسط تشغيل ٨ ساعات في اليوم، الانفرتر بيستهلك ١١٠ كيلو وات شهرياً وهو هو نفس القدره ١.٥
Anis Nabih
Anis Nabih
12-05-2018 - 01:31 pm

يا فندم في اجهزه مش انغرتر بتستهلك 176 ك واط ساعه وهي 2.25
Baraa Fouad
Baraa Fouad
14-05-2018 - 05:31 pm

كل ما زادت القدره قل الإستهلاك بشكل عام انا عندي ٣ حصان انفرتر مش عادي تصنيفه A وبيستهلك ٢٤٠ كيلو واط متوسط ٨ ساعات فكلامك طبيعي ولكن كل ما زادت القدره قل الاستهلاك هتقولي ازاي الرقم بيزيد هقولك لا الرقم بيقل بحساب الحسبه الكليه.
Baraa Fouad
Baraa Fouad
16-05-2018 - 10:19 pm

ثم ان الانفرتر ال ١.٥ عندي بيستهلك ١١٠ هاتلي تكييف في السوق نفس قدرته بيستهلك اقل منه علشان يبقى الكلام واضح والمقارنه صحيحه
Ossama Ghoneim
Ossama Ghoneim
19-05-2018 - 03:55 am

فيه أجهزة A++ ولو كانت مش موجودة في السوق (لا أعلم على وجه اليقين) ولكنها موجودة في الدنيا وموجودة في المواصفة القياسية اللي بيتم الإختبارات على أساسها إستخدام إنفرتر مع كباس له جوانب سلبية وأخرى إيجابية فيما يخص العمر الإفتراضي، هو بيزود ال harmonics ولكنه بيقلل الإحتكاك وبيتلاشى تيار البدء العالي، وفعليا لن أستطيع أن أحكم بشكل نهائي الآن على تأثير الإنفرتر على العمر الإفتراضي لكن المصنعون يقولون أنه يزيده
Anis Nabih
Anis Nabih
21-05-2018 - 10:19 am

يا فندم انا مغير اجهزه انفرتر خلال سنه ونص نتيجه ان الكباس طاير ان انا بتكلم من واقع عملي وأسف اذا كنت تدخلت وشكرا
Ossama Ghoneim
Ossama Ghoneim
23-05-2018 - 05:31 pm

ومن شهر 7 الماضي المواصفة الجديدة منعت الترخيص لأجهزة أقل من C خلاص، والكلام ده أكيد لأني كنت فيي معمل الإختبارات من شهر وإطلعت على المنشور بنفسي
Baraa Fouad
Baraa Fouad
26-05-2018 - 01:31 am

وآسف ليه إحنا بنتناقش ملوش داعي الإنسحاب بدون سبب
Anis Nabih
Anis Nabih
28-05-2018 - 10:19 am

حضرتك الاجهزه ال d و e ما زالت تباع عادي
Ossama Ghoneim
Ossama Ghoneim
30-05-2018 - 07:55 pm

يا فندم مرحبا بك وبكل التعليقات، أنا لا أعمل في أي شركة ورأيي محايد تماما شركة Daikin اليابانية بتنتج أجهزة بالإنفرتر من أكثر من 20 سنة وعندها مشاريع ضخمة منفذة في مصر من سنة 2000 ، ممكن يكون الكباس اللي بالإنفرتر اللي حضرتك غيرته نوعية رديئة
Anis Nabih
Anis Nabih
02-06-2018 - 06:19 am

اللي عايز اوصله ان الانفرتر مجرد موضوع بيبيعوا بيه بسعر أكتر كتير مش اكتر مع جهاز عمره الافتراضي اقل واستهلاك كهرباء مشابه او يقل بقليل وبالتالي لا ما لوش لزمه
Ossama Ghoneim
Ossama Ghoneim
04-06-2018 - 05:31 pm

تباع عادي حاجة وتاخد ترخيص ببطاقة كفاءة طاقة حاجة تانية، والكلام ده خلال سنة مش هتلاقي أجهزة أقل من C
Baraa Fouad
Baraa Fouad
07-06-2018 - 05:31 am

دي وجهة نظرك ووجهة نظري انه جهاز موفر وعندي من ٤ سنين ما شاء الله وموفر بشكل ملحوظ في الطاقه، ده غير صوته الهادي ملهوش صوت أساساً 2
Anis Nabih
Anis Nabih
09-06-2018 - 06:19 pm

عارف الموضوع ده بس الواقع انها ما زالت في السوق
Ossama Ghoneim
Ossama Ghoneim
12-06-2018 - 07:55 am

لا الإنفرتر تقنية موفرة بحق وحقيقي، ممكن يكون فيه بعض الأخطاء لأن الممارسة جديدة على البعض لكن مع الوقت هتبقى هي الstandard في هذه الصناعة
Anis Nabih
Anis Nabih
14-06-2018 - 10:19 pm

Baraa Fouad مبروك عليك وإن شاء الله يكون افضل 2
Ossama Ghoneim
Ossama Ghoneim
17-06-2018 - 01:31 pm

علشان كدة بنقول للعميل إسأل على الضمان وجديته أول حاجة
|