نصائح قيادة السيارة في الشتاء و المطر و الشبورة

شويه نصائح لموسم الأمطار واللي بدأ حاليا
1. المساحات: لازم تتأكد من حالتها وأنها كويسه جدا ولازم تبقي محافظ علي قربه الميه مليانه لأن استخدامها هيزيد عشان الطين اللي هيبقي علي الأزاز تعرف تنضفه
2. الكاوتش: لازم تشيك علي حالته وان النقشه لسه سليمه وتشيك ضغط الهواء بصفه دوريه وحافظ علي الضغط الصح دائما
3. السرعه: تجنب تماما المشي بسرعات عاليه أثناء هطول الأمطار خصوصا في بدايه نزولها عشان الأسفلت حرفيا بيبقي زي الصابون ويستحسن تمشي بأقصي سرعه 60 وتبقي مشغل الفلاشر الأنتظار ولو فيه ضباب يبقي هتشغل مصابيح الضباب قدام وورا حتي لو بالنهار عشان اللي جاي وراك يشوفك.
4. تجنب تماما الدخول في تجمعات المياه وحاول علي قدر الأمكان تمشي في شوارع عارفها لأن المغامره هنا غير محسوبه
5. لو عندك الاختيار انك تتجنب النزول في إنفاق يبقي تجنب النزول في اي نفق حتي لو الطريق هيبقي اطول
6. العربيه عاليه ولكن برضوا فيه حدود ما ينفعش تخطيها وبالتالي تجنب المغامره بعربيتك في تعديه برك كبيره قدر الأمكان
7. ما تركنش في جراجات تحت الارض خصوصا أن جراجات كثير غير مجهزه بمواتير رفع ولو الكهرباء قطعت الجراج أكثر مكان هيتملي ميه
8. لو الأمطار شديده والرؤيه صعبه مش عيب تركن علي جنب واختار مكان امان حتي لو شارع جانبي ونور كل انوار العربيه عشان تنبه اللي جاي ومش شايف ولما الأمطار تهدي شويه ابدأ اتحرك.
9. العربيه فيها مزاريب لنزول الميه وأوقات بتبقي مسدوده من التراب والاوساخ حاول تغسل عربيتك غسله حلوه عشان تنظفها حتي لو هيقولوا ماحدش بيغسل عربيته في الجو ده
10. السواقه في المطر بأيدك الأثنين علي الدركسيون بقاعده 10 و10 والمحافظه علي مسافه كبيره مابينك ومابين اللي قدامك لأن مسافه الفرمله هتزيد نسبيا حسب حاله الطريق لأن اصعب حاجه هو اسفلت برمله ناعمه معجون بميه مطر.
11. التكييف شغال علي طول والأزاز مقفول ودرجه حراره التكييف اقل درجتين من خارج السياره حتي لو هتبرد شويه بس هتتجنب تكون شبوره داخليه علي ازاز عربيتك.
12. لما تدخل بركه ميه خصوصا لو عميقه شويه يبقي وانت خارج منها فرمل كام مره فرامل متقطعه عشان تنظف الديسكات بتاعتك من اي حاجه علقت عليها وعشان تحسن من كفاءه الفرامل وانت ماشي في الامطار.
ربنا يعدي الايام علي خير وربنا يحفظ عربيات الناس كلها
لو حد عنده نصائح زياده يتفضل طبعا ? ?