Omnia Ayman
07-05-2018 - 04:11 pm

بصوا يا جماعة انا محتاجة اواجه نفسي بمشكلتى عشان اعرف و تساعدونى احلها انا واحدة تخينة زايدة عن المفروض اكونه 40 كجم 🙈 مشكلتى ان من صغري و طبيعة اكلنا في البيت نشويات و مقلي و محمر و زيت و سمن و كل الاكل غير صحى بالمرة ... كمان عندهم اعتقاد في البيت انه يوكلوا العيل يكبسوه اكل عشان ينام و يريحهم 😞 فكان بيتعمل معايا كدة و مع الاسف عايزين يكرروا المأساة مع بنتى ... بس طبعا انا واقفالهم بالمرصاد في النقطة دى عشان بنتى ماتشوفش معاناتى بس حقيقي فيه مشكلتين ... انا فعليا باحب الاكل و كمان بافش غلى فيه يعنى باكل بغباء جدا وقت مابقي متضايقة او متوترة ... قطبعا مش باعرف اسيطر على نفسي في اى دايت يتعمل و لو سيطرت مدة حلوة بارجع تانى ... يعنى فعليا حصل ووصلت لقرب وزنى المثالى ب10 كجم و دة كان اكبر انجاز عملته بس وقفت دايت و رجعت اكل بنفس طريقتى فرجعت تانى 😥 المشكلة التانية بنتى برضه فعليا وقت ماتبقي زهقانة تدور على اكل .. هى عندها 4 سنين ... من صغرها برضه عشان تهرب من النوم تدور على الاكل و تاكل فعلا حتى لو لسة متعشية بس عشان ماتنامش و تصحى نفسها بالاكل ... انا مش عارفة اعمل معاها ايه في النقطة دى لان قبل النوم دة بيبقي وقت صعب جدا عليا و عليها فمش باعرف امنع عنها الاكل في الوقت دة ارجوكم متهاجمونيش ... انا فعلا محتاجة حلول عملية


دكاترة مصر

التعليقات (47)

TiTo El-Sery
TiTo El-Sery
15-05-2018 - 07:23 pm

بلاش العيش الاببض اوالفينو الغيهم من حياتكم ..كلوا مشويات او مسلوق وخضروات وفواكه وخففى من الملح والسكريات على قد ماتقدروا ماتجمعيش فى الوجبة بين ارز وعيش مع بعض ..
Ahmed Maher
Ahmed Maher
16-05-2018 - 11:23 pm

خلي نظام البيت كله صحي يعني مينفعش مثلا البنت تفتح التلاجه تلاقي عصاير ومشروبات غازيه وبطاطس محمره ومحشي وايس كريم مينفعش مثلا تحطلها في الوجبه اكتر من نوع نشويات مينفعش الاكل في اي وقت وف اي معاد فيه مواعيد للبيت لو جاعت تعملي حسابك يكون عندك snacks قليله السعرات وفاكهه مثلا فراوله او بطيخ او اناناس او خيار او خس الشيبسي والمشروبات الغازيه نستبلها بعصاير فريش نفطر كويس عشان المجهود اللي بتبزله في اللعب طول اليوم لو جاعت قبل ما تنام ممكن لبن عليه عسل او زبادي بعسل وتفاح
TiTo El-Sery
TiTo El-Sery
18-05-2018 - 04:11 am

الجبنة القريش كويسة واللبن خالى الدسم كويس وبلاش المعجنات والمقليات
TiTo El-Sery
TiTo El-Sery
19-05-2018 - 09:47 am

كلوا كل حاجة بس بطريقة صحية .. السمك مشوى بلاش المقلى اللحم مشوى او مسلوق بلاش المتحمر صدورالفراخ المسلوقةاو المشوية وشيلى الجلد منها
TiTo El-Sery
TiTo El-Sery
20-05-2018 - 04:11 pm

الفاكهة والخضروات تمام
TiTo El-Sery
TiTo El-Sery
21-05-2018 - 11:23 pm

الجسم بيحتاج لعناصر غذائية ..اوعى تفقديها
TiTo El-Sery
TiTo El-Sery
23-05-2018 - 07:23 am

بلاش وبحذرك من اى ادوية او علاجات مزعوم انها تخسس بلاش منها ..
Lamiss Om Marwaan
Lamiss Om Marwaan
24-05-2018 - 04:11 pm

اشغلي بنتك برياضه ووديها حضانه ومتخلهاش تنلم بالنهار كتير علي اساس يجي بليل تكون جابت اخرها وتنام ومتحتاجش تهرب
TiTo El-Sery
TiTo El-Sery
26-05-2018 - 01:47 am

الرياضة مهمة لو ح تمشى كل يوم نص ساعة ده يعنى اقل الرياضيات
Seif Ahmed Farouk
Seif Ahmed Farouk
27-05-2018 - 12:11 pm

مفيش اي حلول الا ان تتحلي بالاردة محدش حيساعدك الا نفسك
Ahmed El-Baqri
Ahmed El-Baqri
28-05-2018 - 11:23 pm

مبدئيا كده لازم 3 حاجات تمشي عليهم تمنعي السكر نهائيا في اكلك تقللي الملح علي اد ما تقدري بس متمنعيهوش تقللي الدقيق الابيض علي اد ما تقدري وبعد ما تعملي دا تمنعي اي حاجة مقلية وتتجهي للمشوي او الحاجة المعمولة في الفرن يعني اي حاجة بتفكري تقليها اعمليها فالفرن افضل اخر حاجة لو نطيتي الحبل كل يوم من 15 ل 30 دقيقة بجد الموضوع هيفرق معاكي جدا 2
Jane Aboulenein
Jane Aboulenein
30-05-2018 - 11:23 am

بصي انا عشت نفس مشكلتك دى بالضبط وعانيت منها سنين وزاد عليها كمان انى عندى مشكلة نفسية كبيرة مع التخن. لو تخنت شوية حرفيا بكتئب . وكنت فى فترة فى حياتى ابدا فى دايت وامشى عليه شوية و اول ما يبدأ يظهر نتيجة اهجم على الاكل و ابوظ كل حاجة وارجع اكتئب تانى. الموضوع ده ماتحلش إلا بدكتور نفسي. و أدوية وحاجات كده والحمد لله الامور اتظبطت جدا و ما اخدتش وقت كبير. بالنسبة لبنتك انا بنتى نفس القصة بالضبط وعارفة كويس ان جدها وجدتها اهم حاجة عندهم الاكل و بتستغل نقطة الضعف دى لما تبقي عايزة منهم حاجة. بس انا بصراحة قفلت لها السكة دى خالص ومعنديش اى مشكلة انها تنام جعانة ومفيش اكل بالليل يعنى مفيش اكل بالليل. و لما تبقي تصحى تاكل التلاجة كلها لو عايزة مش مشكلة.
Andraws Karam
Andraws Karam
01-06-2018 - 12:11 am

بما ان حضرتك مش هتعرفي تعملي كنترول علي الاكل (عادي كلنا كده 😂) الحل الوحيد تعملي عمليه تكميم معده و ده هيخليكي تحسي بالشبع بسرعه و متاكليش كتير 4
Mohamed Walid
Mohamed Walid
02-06-2018 - 01:47 pm

ولا عملية تكميم ولا رجيم.... ربنا يبعد عنك الأمراض ... طبيعة جسمك كده... هرمونات الغدة الدرقية عليها عامل فى امتصاص الاكل... فيه ناس افرازات الهرمون ده عالى فلا يأثر فيهم كمية الأكل حتى لو أكلوا خروف كامل.. وناس افرازات الهرمون قليل فيتم امتصاص اغلب الاكل حتى لو كميته قليلة.. رمضان كريم..
Mhmd Ahmed
Mhmd Ahmed
04-06-2018 - 04:11 am

حافظى على بنتك واعمليلها مقدار معين من الاكل تشوفى انه مناسب لسنها ولو طلبت تانى قوليلها لا وممكن تكمل خيار طماطم سلطه واحده واحده هى هتتعود على كم اكل معين هى لسه صغيرة بلاش توسعى معدتها وبعد كده تندمى وتدوخى معاها عشان تخس…See More
Rehame El Henawy
Rehame El Henawy
05-06-2018 - 07:23 pm

اقول لك انا شخصيا بعمل ايه لما بتفرط منى: مش بجيب اكل! بخلى تلاجتى يهرب منها الفار! مفيش فى البيت اكل بيتخن، معنديش... و كل ما احس بالملل او انى (عايزة اكل) لمجرد الاكل، بشرب ميا كتير و بعمل الأكلة بأكلتها، يعنى بسوى (ربع فرخة) او (شريحة سمك فيليه) واحدة بس قبل الوجبة مش بخلى اكل فى التلاجة بحيث يبقى سهل لما ازهق اقوم القط منه... "معنديش اكل" 😁 لما جوزى بيكون موجود، بعمل برده على اده الاصناف اللى هو بيحبها و انا مش بحبها علشان ما تغرينيش اكل منها + عاملة مقدار يكفيه لوحده فمش بيدينى و لا بيعزم عليا 😂 بخس تلقائيا و بتعود على كم معين بيكفينى و بشبع عليه... مش برجع تانى 9
Mariam Serry
Mariam Serry
07-06-2018 - 11:23 am

نزلي بنتك تلعب رياضة او اتنين وتعالى على نفسك واشغليها بالأنشطة وتصحى بدري وتنام بدري وكمان خلي قدامها خضار وفاكهة كتير تاكل زي ما تحب وبالنسبة ليكي بقى هي ارادة قوية مع چيم وايروبكس
Shimaa Tamer
Shimaa Tamer
09-06-2018 - 04:11 am

كل الاطفال اول ما تقوليلهم ناموا يقولوا جعانين تاكل بقى تفاحة خيارة حاجات كدا وهو دا الموجود ومفيش غير كدا 2
Noha Hassan
Noha Hassan
10-06-2018 - 09:47 pm

البنت بتاخد كل حاجه من مامتها يعني لو انتي اعتدلتي في اكلك هتلاقيها هي كمان واحده واحده اتعودت عالاكل الصحي والكميات المعقوله ..مايبقاش كل يوم نشويات ومقلي ..عالاقل مرتين او ٣ خضار في الاسبوع ومره سمك ومره فراخ مشويه مثلا واليومين التانيين عادي مكرونه ومقليات مفيش مشكله .مانتي برضه ماينفعش تمنعي طفله من الاكل ..قللي الحلويات في البيت وبدليها بفاكهه وخيار وجزر وخس مثلا ..هي لسه صغيره تقدري تسيطري عليها ماتسيبيهاش لما تكبر وبعدين نقعد تدور ازاي تخسس نفسها
Deena Mustafa
Deena Mustafa
12-06-2018 - 04:11 pm

ابني لما بيعمل كده بقوله خلاص معاد العشا خلص و مفيش اكل غير بكرة مرة ف مرة اتعلم ان مفيش منني امل و بطل بس لسه بيعمل الحركه دي مع جدوده عشان بيطاوعوه .. لازم تبقي قدوة لبنتك و انصحك بتكميم المعده .. خديها معاكي جيم تلعب ايروبكس و تتنطط و تطلع طاقه و تحرق
Sayed Hassan
Sayed Hassan
14-06-2018 - 11:23 am

لازم عزيمة
Mariem Mohamed
Mariem Mohamed
16-06-2018 - 07:23 am

صومى ومش بهزر والله
Huda Rashed
Huda Rashed
20-06-2018 - 01:47 am

ماما ربنا يديها الصحة واحنا صغيرين الساعة 8 بليل تمنع الاكل حتى لو جعانين كنا بنضايق نزعل منها بس لما كبرنا فهمنا جسمنا كان حلو ممشوق القوام زى مابيقولوا ماكنش فيه سلولايت ولا فيه بطن ولا هالات سودا مع العلم ان احنا طول النهار مش بنبطل اكل فعلا هى كانت صح اعملى مع بنتك كده وصدقينى هتزعل بس بكرة تكبر وتجعلك💜 3
Mohamed Farouk
Mohamed Farouk
22-06-2018 - 12:11 am

اشتركى لها فى اى رياضه
Alaa Mahmoud
Alaa Mahmoud
23-06-2018 - 11:23 pm

غيرى با اكل صحى امنعى سكر و ملح بالتدريج قليلى سمنه و اسبدلى بزيوت نباتيه زى زيتون جوز هند خلى عندك خضار كتير و فاكهة متعمليش دايت لا خلى الاكل الصحى و النظام الصحى عمتا لايف ستايل او اسلوب حياه قللى بالتدريج لحوم هيفرق معاكى جدا متخليش همك تخسى اد ما يكون همتك يكون الاسلوب صحى و تصفى جسمك من السموم اللى فيه هياخد سنه اتنين لحد. ما تتعودى مش مشكله المهم صحتك انتى و بنتك ربنا يخليهالك ❤
Bassem Ali Zinhom
Bassem Ali Zinhom
25-06-2018 - 11:23 pm

زي م الناس قلولك ، عمليه تكميم هتكرهي الاكل وهيبقي بالنسبالك الربع رغيف تخمه، بس خدي قرار انهي تستحمليه اكتر انك تقبلي نفسك كدا او تعملي العمليه ، حياتك حتتغير تماما ، بنتك مع الرياضه اللي بتحبها خليها تتحرك ف النادي وكدا والعشا مفهوش غير خضار او فاكهه…See More
Amira Hafiz
Amira Hafiz
28-06-2018 - 12:11 am

هاتي خضار كتييييير خيار وخس وسلطة ولو فاكهة ماشي وكل ما تجوعو كلو منه
Nadoosh Samy
Nadoosh Samy
30-06-2018 - 01:47 am

بالنسبالك غيرى العادات بتعتك يعنى لما تضايقى ارسمى او اعملى حاجة يدوية ذى الكروشيه او خياطة تطريز اى حاجة تشغل ايدك و تطلع الطاقة و عن تجربة بتنفع ...و حولى قبل الغدا اشربى كوب مياة و كلى طبق سلطة كبير فهتملى نص بطنك فهتكلى من باقى الاكل كميات اقل ....بالنسبة لبنتك نبهيها ان بعد العشا هتنام و مفيش اكل و لو جاعت اسمحى باللبن و الخضار و الفاكهة فلو جعانة هتشبع اكل صحى لو بتهرب من النوم الاكل ده هيخليها تهرب منه للنوم 😂 2
Dode Dori
Dode Dori
02-07-2018 - 04:11 am

امشي
Dode Dori
Dode Dori
04-07-2018 - 07:23 am

متقعديش افضلي امشي امشي امشي
Amani Ebaid
Amani Ebaid
06-07-2018 - 11:23 am

غيري نظام الأكل..ما تشتريش سمن و لا زبدة و لا مكونات الحلويات..خلي دايما عندك فاكهة و خضروات و زبادي و شوفان استبدلي المسلوق و المشوي بالمقلي ..يعني عموما خلي الريجيم او الاكل الصحي نظام حياة..و امشي كتير و اشربي مية كتير و اشركي بنتك في انشطة رياضية
Amira Saber
Amira Saber
08-07-2018 - 04:11 pm

بنتك لعبيها رياضه زى السباحه او الجمباز ولو حابه تاكل عادى اكليها اكل صحى زى فاكهه وخلافه انتى بقى عندك حل من اتنين مالهومش تانى يا تلتزمى بدايت ورياضه حتى لو تابعتى مع دكتور دايت ولما تتضايقى اشغلى تفكيرك باى حاجه غير الاكل لانك مهما هتاكلى مش هتشبعى يا اما تلجاى لعمليه من عمليات السمنه وليها فاعليه روعه لو فشلتى ف الاختيار الاول
Rony Ahmed
Rony Ahmed
10-07-2018 - 09:47 pm

بنتك في غير اوقات الوجبات الرئيسيه علميها تاكل خصار فاكهه او زبادي بس وخليكي حاسمه معاها علشان متتعبش اما تكبر وتقريبا هيا عندهافراغ وبتشغل نفسها بالاكل 2
Ahmed Zain El-abden
Ahmed Zain El-abden
13-07-2018 - 04:11 am

اشربى مياه كتيييير
آیۃ سعيد
آیۃ سعيد
15-07-2018 - 11:23 am

عمرك اصلا ما تقدري تساعدي بنتك غير لو بدأتي بنفسك يعني مستحيل تخليها تلتزم بأكل صحي وانتي بتاكلي ادامها ما لز وطاب الفكره فيكي عاوزاها تلتزم مشي البيت كله بنفس النظام وبعدين الاكل الصحي مش حرمان هو مقنن بس في النشويات والحلويات في جروب اسمه ريجيم قراطاي بيعتمد اصلا ع الدهون الصحيه زي الزبدة والسمنه البلدي وبتوقفي مؤقتا النشويات والحلويات الصحيه لحد ما توصلي للوزن اللي عاوزاه وبعدها تدخليهم بانتظام ابدأي بنفسك
Osama Abohashem
Osama Abohashem
17-07-2018 - 07:23 pm

الموضوع كله ارادة وعند وقوة تحمل و صبر الافضل تابعى مع دكتور متخصص وهو هيتابعك ويحطلك جدول مناسب او يقول تكميم او غيره لكن من اساسه ما تشتريش اى أطعمة يتسبب زيادة الوزن زى البطاطس والعيش الأبيض والبيبسى والعصاير و.... وكترى من وجود الفاكهة والخضار فى البيت وبرضه اعملى لنفسك على الاقل نصف ساعة فى اليوم مشى متواصل دى على الاقل هثبت الوزن بالنسبة لبنتك لازم تشتركي ليها فى اى نشاط رياضى وتشغلى وقتها باى حاجة وتتفقى معاها ان بعد الساعة مثلا ٨ او ٩ ما فيش اكل وعموما ما فيش اكل قبل النوم بثلاث ساعات الحاجات دى هتيجى واحدة واحدة وتبقى بعد كدة من أساسيات حياتك
Sara Zaki
Sara Zaki
20-07-2018 - 04:11 am

لما تعوزي تفشي غلك اعملي فشار اي كمية واقعدي كلي انتي وبنتك.. بدلي في البيت اي حلويات بفواكه وخضروات عشان غصب عنكوا لما تدوروا علي اكل تلاقوا خضار وفاكهة ودا عادي جدا، اشركي بنتك في رياضة عشان تفك عن نفسها وقعدتها وتحرق الاكل دا وافهمي ان الرياضة ليها منجى مش رفاهية، اي رياضة بتحرق مثلا جمباز فني او ايقاعي او ايروبكس او سباحة دا اللي متناسب نع سنها، بالنسبة لك تتضايقي كلي خضار فاكهة فشار ماية اشربي ماية كتير جدا جدا واجبري نظام اكل البيت كله صح عشان بنتك مش عشانك، لو انتي ضعيفة تجاه نفسك فغريزتك انك تحمي بنتك هتجبرك تعملي الصح عشانها واستفيدي معاها .. احمي بنتك من كل ااامراض اللي ممكن تحصل ليها بعد الشر بسبب الاكل دا..بالنسبة لاهلك لحد ما تظبطوا النظام الغذائي ليكي ولبنتك وتنزليها رياضة حاولي متروحيش غيو في الضروريات جدا وفهميهم ان دا عشام كذا وروحي في غير مواعيد الاكل 3
Abeer H. Eldeeb
Abeer H. Eldeeb
25-07-2018 - 12:11 am

هي بتقلدك علي فكره مش اكتر
Enas El Safty
Enas El Safty
27-07-2018 - 11:23 am

اعملي تكميم بالنسبه ليكي هيكون ممتاز بالنسبه لبنتك خليها لما تجوع تاكل فاكهه واشغليها باللعب
Radwa Abdel Aziz Amin
Radwa Abdel Aziz Amin
01-08-2018 - 12:11 pm

بصي يا بنتي لازم اول حاجه تفرقي بين مشكلتك الشخصيه وبنوتك .. الاطفال بتاكل قبل مبتنام وبيعملوا اللي عشان مينموش وميصحوش بصراحه .. ممكن بتعند معاكي عشان انتي متاثره بالموضوع الاطفال بتحس . متركزيش مع البنت غير انها لما تاكل تاكل اكل صحي وبراحتها من غير اجبار أو أنك تبصلها باشمئزاز لما تاكل وتحس انك مضايقه ..ده اولا .. ثانيا :انتي قدوة بنوتك يعني هي بتتعلم منك،كإنك واقفه قدام مرايه بالظبط،بتفشي غلط ف الاكل هتقلدك انتي قدوتها فلان تتغيري عشان خاطرها عيالنا بيربونا وديه حقيقه.. ومتجوعيش نفسك امنعي المقليات تماما واعتمدي ع الشوي .. الدهون اللي ف الاكل قلليها والسمنه البلدي طبيا الأقل ضرارا واستخدميها بحدود وكل كل ساعه ايون الاكل كل ساعه او ساعتين يتزود معدل الحرق ومبتكليش كتير لأنك مبتجوعيش فبتقلي جدا.. افطري كويس ف الاول وبعدها تبتدي كل ساعتين تاكلي حاجه قليله ربع رغيف خضار اوفاكهه .. وتكرري ده كل ساعتين معبال وقت الغدا هتكوني شبعانه فمش هتاكلي .. وتنظيم النوم مهم لزياده الحرق وع قدمتقدري امشي حتي لو ف البيت .. وقبل اي حاجه لازم تحللي تحاليل الغده الدرقيه TSH T3 T4وتستبعدي اي خلل فيها لان لو فيه خلل لو عملتي ايه مهتخسيش .. تمام النظام ده حلو جدا وبيخسس جدا وهتستغربي من انك شبعانه وبتاكلي كميات تعتبر كبيرة ع رجيم وبتخسي .. شهر فالتاني معدتك هتصغر وعتبتدي تقللي ف كميه اكلك وهتتظبتي جدا ... اكتر فتره حسيت فيها ف حياتي وكنت باكل اكتر من اي وقت بس وجبات صغيره متفرقه والكلي كل حاجه ما عدا المقليات والحلويات تقللي منها وطبعا تمنعي البيبسي والشيبسي والحاجات ديه غير كده كلي من نعم الله .. شهرين تلاته وهتحسي بفرق لما تظبط معاكي ادعيلي الله يكرمك
Sarah Salah
Sarah Salah
04-08-2018 - 01:47 am

طيب ازاي عايزه بنتك متاكلش بالليل وهيا شيفاكي بتاكلي ! مينفعش نمنع ولادنا من حاجات احنا نفسنا بنعملها عمررررهم ماهيبطلوها .. ابداي بنفسك الاول بجد مش هتعرفي تظبطيها الا لماا تظبطي نفسك .. …See More
Nesma Esmail
Nesma Esmail
06-08-2018 - 04:11 pm

حاولي تكتري من الأكل الصحي والخضار زي الجزر والخيار والخس والفاكهة ليكي ولبنتك. وحاولي تشتركي لها في أي نادي او رياضة والأنشطة الاجتماعية بتاعة الأطفال وهتلاقيها مش هتركز مع الأكل أوي. وربنا يعينك
Sara Nabil
Sara Nabil
09-08-2018 - 07:23 am

اعملي أكل صحي
Mostafa Kenawy
Mostafa Kenawy
11-08-2018 - 11:23 pm

طب ماتاكلى بس احرقى باستمرار
Nada Youssry Abdelmoniem
Nada Youssry Abdelmoniem
14-08-2018 - 04:11 pm

كلي براحتك و متتعقديش بس كلي بكمية قليلة كل فترة عشان حجم معدتك يصغر مع الوقت، كمان هتلاقي انك انتي اللي بترفضي الأكل و تشغيل نفسك بحاجة بتحبيها لو بتحبيه الأكل اوي اعمليه انتي و بيعيه اعملي مجهود بدني و فكري يخرجك من التوتر البسي و انزلي خدي بنتك و خليها ترسم و تكتب خليها أول ما تبقي عايزة تهرب من حاجة تهرب لحاجة مفيدة خليها ترقص متقوليش مش وقته عشان احنا ممكن نرفض للأطفال انهم يرسم يرقصون يلعبوا بس يأكل عادي!! ابني عادات كويسة و محترميش نفسك من الأكل بالعكس بس كلي المفيد و بكمية معقولة علي فترات 3
Islam Ibrahim Mohamed
Islam Ibrahim Mohamed
17-08-2018 - 09:47 am

دائما كنت بقدر اعمل دايت وانزل وزني بسهوله نسبيه بس مشكلتي اني بعد الدايت كنت باكل عادي وارجع لوزني الي كنت عليه تاني... لقيت ان افضل طريقه بالنسبالي اني احافظ علي وزني اني قررت اني ماكلش اكتر من رغيف واحد في الوجبه حتي لو كنت لسه جعان.. مع الوقت بقيت حاسس ان الرغيف ده بقي يشبعني وبقي كفايه بالنسبالي 2
Fayrouz Alaa
Fayrouz Alaa
20-08-2018 - 04:11 am

انتى لازم تغيرى نظام اكلك لاكل صحى ليكى ولبنتك وتلعبو رياضه بنتك ممكن سباحه وصومى صوم متقطع حتلاقى معدتك قفلت لوحدها
|