رحلتي الى مرسى مطروح صيف 2023

تجربة سفر شخصية لمرسى مطروح صيف ٢٠٢٣.

بالنسبة للطريق، مصر اسكندرية الصحراوي اتجاه الاسكندرية وصولاً للعلمين
مفتوح وتم الانتهاء من الاصلاحات بالكامل، بالنسبة لوصلة العلمين تم
توسعتها ولكن ما زال فيها بعد المطبات الهوائية وطبقة الاسفلت مش أفضل حاجة
أظن لسه بيكملوا تطوير فيها، من مارينا ٥ لحد هاسيندا الطريق طبعا عالمي
وردار تحت كل كوبري السرعة ٨٠، بعد الساحل اتجاه مطروح الطريق اتغير كثير
عن السنين اللي فاتت، شغالين فيه اصلاحات فيه ٦ تحويلات لحد ما توصل مطروح
بشكل عام الاسفلت ممتاز لكن مينفعش تمشي بليل عليه لإن مفيش تحذيرات مُضيئة،
بالنسبة للرجوع اسكندرية الصحراوي مقفول حارتين ومفتوح ٢ فقط لو عايز تسرّع
امسك اليمين لكن بلاش في التأني السلامة.

بالنسبة للسكن، الإقامة كانت في قرية بلو بيتش، سعر الليلة كان ٢٠٠٠ج لشقة
غرفتين و٢ حمام صف أول على البحر مباشرة (سعر في العيد فقط وبعد العيد بتقل
شوية)، القرية جميلة واصحاب العمارة ناس محترمين والشقة كانت نظيفة
والتكييفات ممتازة والخدمة ١٠١٠، القرية فيها خدمات من مطعم وسوبر ماركت
يعني بليل مش محتاج تنزل وسط البلد غير لو حابب تغير الأكل أو الزحمة وحشتك
فتنزل على شارع اسكندرية لكن بيكون زحمة جدا وسوق تجاري كبير..

بالنسبة للشواطئ، شاطئ القرية مش أفضل حاجة وفيه شوائب بسيطة، لكن خط
الاُبيض كله شواطئ ممتازة، زي شاطئ زمُرده، وشاطئ الابيض العام، وشاطئ القوات
المُسلحة، متوسط سعر الشمسية بالأربع كراسي من ٨٠ج لـ ٢٠٠ج حسب الشاطئ..

حالة البحر والموج كنت قبل ما انزل بفتح صفحة الراجل الطيب ده دواس
جبرولي
بيعمل لايڤ لحالة البحر عنده في الشاطئ بالنسبة للبحر المفتوح، لو الموج عالي بنروح بحر مقفول (له صدادات) وبيكون الموج هادي وجميل.

بالنسبة للإقامة اتعاملت مع سمسار مُحترم اسمه مدحت وده رقمه لو حد محتاج
رقمه ممكن ابعته
ووصيت صديقي المُحترم ابوحنين هاني العقده
من سُكان مطروح يروح يشوف الشقة ويتأكد منها قبل ما أوصل وكثر خيره عملوا الواجب وزيادة..

بالنسبة للبلد بشكل عام مش أول مرة اروح مطروح وهي فعلاً من افضل الشواطئ
وانظفها واحلى بكثير من شواطئ الساحل الشمالي، يمكن بُعد المسافة هو العائق
الوحيد لكن مع تحسين الطريق كان جميل ومُريح ومفيش فيه مشاكل زي زمان، اهل
مطروح من أفضل الناس في المُعاملة وبيرحبوا بالزائرين والابتسامة علطول على
وجوههم..

لكن البلد محتاجة للإهتمام بشكل أكبر من السيد المحافظ خاصة الطرق الداخلية
ونظافتها والإضاءة ليلاً بالطريق الواصل بين وسط البلد والقرى على الشواطئ
وصولا لشاطئ عجيبة.

تمنياتي للجميع باجازة سعيدة بإذن الله.