افضل نوع طابعة 3 فى 1 من حيث التوفير في الحبر والجودة

بلاش الانواع الإنك ink، الماكنة رخيصة لكن غير موفرة. الليزر أفضل فى
الاستهلاك وأعتقد كمان فى عمر الماكنة.
ولو عايزة حاجة تستحمل الشغل التقيل، فالطابعات الصغيرة زى اللى فى الصورة
أعتقد مش مناسبة وابعدى عنها. أعتقد الطابعات الكبيرة فى الحجم والتقيلة فى
الوزن ده مؤشر على جودة الخامة.
الطابعات المستعملة استيراد الخارج لو موديلات مش قديمة أوى، أعتقد اختيار
كويس. الماركات المنتشرة منها أفيشو وكيوسيرا وتبعها ماركة تريومف أدلر.
بتطبع ألوان كمان بس دى أكبر فى الحجم وتقيلة جدا فى الوزن لكن أعتقد
ممتازة، لكن أنا معرفش أرشح موديل معين. لكن بعض الأنواع تعريفها ع
الكمبيوتر كـ Scsnner معقد أو مش بالطريقة المعتادة لتعريف الأجهزة، فخلى
التاجر يوريكى الاسكانر يتعرف ازاى وتجربيه أدامه. وكمان وانت بشتريها
اختبرى الأجزاء الميكانيكية اللى بتتفتح وتتقفل زى درج الورق والأبواب، مش
بس تختبرى الطباعة، وشوفى عدادها طبع كام ألف ورقة، علشان ده مؤشر أجزاء
الطابعة مستهلكة ولا تعتبر جديدة.
الخصائص اللى تسألى عليها: الطابعة بتسخن فى زمن أد إيه أول ما تشغليها
وتطلع أول ورقة. وسرعة طباعة كام ورقة فى الدقيقة، والطباعة عى الوجهين،
ولو هتصورى عليها ورق (تصوير مستندات مش طباعة) يبقى لازم يكون موجود فيدر
Feeder. ولو تحبى تطبعى من موبايلك أو اللاب توب بسهولة من غير توصيل
بالكابلات يفضل يبقى لازم يكون فى الطابعة واى فاى. بعض الطابعات فيها مدخل
فلاشة تحطى فيها الفلاشة وتطبعى من إعدادات الطابعة بدون كمبيوتر، لكن
بتدعم ملفات معينة. لو محتاجة تطبعى على ورق A3 (أدى ورقتين A4 جنب بعض)
يبقى هحتاجى طابعة كبيرة زى بتاعة المحلات (ماكنة التصوير) علشان فيها درج
كبير ياخد ورق A3، وأكيد كمان الاسكانر بتاعها كبير ويسحب برصه ورق A3.