هل يمكن حفظ القرآن الكريم بالتجويد لوحدي بدون محفظ ؟

طبعا ينفع تحفظ لوحدك وسهل جدا ، التزم بقدر محدد بسيط مش كبير واعتمد انك تسمع اللي هتحفظه قبل ما تحفظ عشان تحفظ صح ، بس طبعا لازم تسمع من حد متقن وارشحلك الشيخ الحصري والشيخ عبد الرشيد صوفي ، لكن اهم حاجه متقصرش ف يوم واحد لان يوم بيجيب يوم ويوم بيجيب عشره وهتلاقي نفسك ضيعت اللي عملته ، اما بالنسبه للتجويد فمينفعش تتعلم لوحدك طبعا ، لكن لو عايز حد يعلمك اونلاين عرفني وانا هأقولك على جمعيه ممتازه ومجانا

زمان كنا بنجيب شرايط كاست ونقرأ وراها عشان نحفظ .. دلوقتي الانترنت في مواقع كثيرة فيها قران بجميع اصوات الشيوخ وطبعا كلهم بيقراوا صح وبتجويد وتقدري تعيدي الحته الي عاوزه تعيديها تاني وفي ابليكيشن في الموبايل كذالك .. كلها هتؤدي الغرض

في ممكن تحفظي مع معلمة عن طريق برنامج الزوم وبتكون حلقة وفيها معلمة وطلبة سرشي عن موقع ربيع القرآن ومجاني طبعا او ابعتيلي لو كده ابعتلك رقم المشرفة تواصلي معاها واتس

البداية لازم و حتما معلم ... بعد التعود علي قواعد القراءة الصحيحة ممكن قراءة القرآن كله بدون معلم ... انا اعرف ناس عملوا كده

صعب تحفظ لوحدك صح .. لابد من محفظ أو دار للمتابعة والإلتزام ... بالنسبة لعدم وجود وقت صدقني هذه خدعة نقع كلنا فيها، إذا كان عندك إرادة ستوفر الوقت دون التأثير على التزماتك الأخرى ... ولا تنسونا من صالح الدعاء ...

فى مجموعات على زوم و الواتس و اعرف مجموعه ماسكها شيخه كبيره معاها إجازة فى القراءات العشر لو تحبى ابعتلك رقم مشرفه

تقدرى تحفظى بعون الله تستخدمى المصحف المعلم للحصرى ، هتحتاجى كتب أساسية زى تحفة الأطفال اللى هتعرفك الاحكام بإيجاز ولو عايزة تتعمقى اكتر يبقى كتاب غاية المريد فى علم التجويد وحل انك لازم تقرأى ع حد عشان يصحح لك ففيه تطبيق "تسميع" تقدرى تستخدميه كبديل.. ربنا ييسرلك الحال ?

امشى خطوة بخطوة ... ركزى فى تعلم التلاوة والقراءة السليمة ... وتعهدى القرآن بالتلاوة المستمرة .. ختمات تلاوة متكررة .. حتى تصلى لمرحلة التدبر مع التلاوة .... وبعد ذلك هتلاقى الحفظ سهل .... لكن من حيل النفس عندما يطرأ على صاحبها ومضة من العزيمة أو الهمةأن تزين له الهدف البعيد والصعب ... فمثلا إذا تعلقت الهمة بالقرآن حدثته عن " الحفظ " .. فإذا شرع فى الحفظ ووجد مشقة وصعوبة .. توقف تماما وأبتعد عن القرآن بالكلية .. لا هو قرأ .. ولا هو تدبر .. ولا هو حفظ ... لدرجة انك تجد كثيرا من الناس لا يحفظ إلا بدايات سورة البقرة .... لأنه يبدأ بهمة فيحفظ ربع أو أكثر من البقرة ثم يتوقف ... وبعد سنوات تأتيه ومضة أخرى من ومضات الهمة والعزيمة .. فيحفظ نفس الربع فى البقرة .. وهكذا .... وتمر السنين وهو لم ينظر إلى باقى القرآن .. ممنيا نفسه باليوم الذى سيحفظ فيه القرآن كاملا .. فينقضى عمره وهو لم يحقق أهم شيء وهو " التلاوة " المتكررة ... ولم ينتفع بالتدبر ..... فى مصحف أسمه مصحف التجويد .. معمول بالألوان للتعود على الأحكام .. فى غاية الروعة والنفع .... بعد ما تتمكنى من التلاوة .. فكرى فى الحفظ .

اه بأحاول مع جروب اسمه معا لحفظ كتاب الله

حفظ لوحدك صعب جدااا عن تجربة الواحد بيستنر فترة وبيقطع لازم تلتزمي مع حد ... في اونلاين ، اما بالنسبة للتجويد ممكن تطبقيه عن طريق التلقين اسمعي المصحف المعلم للحصري بيقرأ الاية بالتجوبد ويسيب ثواني تردديها ، اما نظري التجويد ممكن تسمعي لحد موثوق من اليوتيوب علشان تعرفي المخارج والصفات والتفصيل في كل شيء ، وربنا يرزقنا حفظ كتاب الله والعمل به يارب ويجعلنا من اهله

في تعليم عن بعد وانتي قاعده فالبيت ساعه بس كل يوم اسمها اكادميه تحفيظ القرآن المسجد النبوي

إسمعي للشيخ ايمن سويد ف التجويد واحفظي مع التجويد

ممكن برنامج ايات بيسهل الحفظ جدا بس برده في النهاية لابد من محفظ

القرءان لازم يتحفظ من حد ... لكن ابدأ لحد ما ظروفك تسمح أحسن من مفيش

لكي تحفظي القرآن وتتليه تلاوة صحيحه لابد من القراءه على حافظ مجود لكي يصحح لكي القراءه فقراء القرآن لها قواعد لن تتعلميها الا بالتلقي واذا قمت بالحفظ منفرده قد تستطيعين الحفظ ولكن سيكون في قراءتك خطأ

ما شالله ممتازه Safaa Lashin